യുഎഇ നിവാസികള്ക്ക് ഇന്ന് ആശ്വാസത്തിന്റെ സെപ്റ്റംബര് മാസാരംഭമാണ്. യുഎഇയില് ചിലയിടങ്ങളില് അന്തരീക്ഷ താപനില കുറയുമെന്ന് ദേശീയ കാലാവസ്ഥ നിരീക്ഷണ കേന്ദ്രം (എന്സിഎം) അറിയിച്ചു. കൂടാതെ ചിലയിടങ്ങളില് മഴയ്ക്ക് സാധ്യതയുണ്ട്.
കിഴക്കന് മേഖലകളില് സംവഹന മേഘങ്ങള് രൂപപ്പെടുന്നത് മൂലമാണ് ചിലയിടങ്ങളില് ഉച്ചയ്ക്ക് ശേഷം മഴപെയ്യുന്നത്. എന്നാല് യുഎഇയിലെ ചില പ്രദേശങ്ങളില് 46 ഡിഗ്രി സെല്ഷ്യസ് വരെ ആയിരിക്കും മെര്ക്കുറിയുടെ അളവ്. ഇത് ദുബായ്, അബുദാബി, ഷാര്ജ എന്നിവിടങ്ങളില് 41 ഡിഗ്രി സെല്ഷ്യസ് വരെയുമായിരിക്കും. ഇന്നു രാത്രിയിലും നാളെ രാവിലെ വരെയും ഈര്പ്പം നിറഞ്ഞ അന്തരീക്ഷമായിരിക്കും ഉണ്ടാവുക. ഇത് മൂലം തീരദേശങ്ങളിലും ഉള്പ്രദേശങ്ങളിലും മൂടല് മഞ്ഞിനും സാധ്യതയുണ്ട്.
തെക്കുകിഴക്കന് ദിശയില് നിന്നും വടക്കുപടിഞ്ഞാറന് ദിശയിലേക്ക് വീശുന്ന കാറ്റ് മണിക്കൂറില് 40 കിലോമീറ്റര് വേഗതയില് വരെ എത്താനും സാധ്യതയുണ്ടെന്ന് കാലാവസ്ഥ നിരീക്ഷണ കേന്ദ്രം. അറേബ്യന് ഗള്ഫില് കടല് പടിഞ്ഞാറോട്ട് നേരിയതോ മിതമായതോ ആയിരിക്കും. എന്നാല് ചിലപ്പോള് കടല് പ്രക്ഷുബ്ദമാകാനും സാധ്യതയുണ്ട്. എന്നാല് ഒമാന് കടലില് സാധാരണ രീതിയിലായിരിക്കും.
Content Highlight: UAE is expected to see a slight drop in temperatures today, offering residents some relief from recent heat, according to the National Centre of Meteorology.